ការបំពានលើសេចក្តីសម្រេចខ្លះៗរបស់តុលាការ

សេចក្តីផ្តើម

ប្រទេស ឬរដ្ឋណាក៏ដោយជាទូទៅមិនថាប្រកាន់យករបបនយោបាយណាមួយនោះទេ ទោះបីប្រទេសសេរីនិយម ឬក៏ប្រទេសសង្គមនិយមក៏ដោយដើម្បីធានាឲ្យបាននូវសន្តិសុខ   សណ្តាប់ធ្នាប់សង្គមឲ្យបានល្អនោះ គេទាមទារឲ្យមាននីតិសម្រាប់គ្រប់គ្រងហើយនីតិដែលដើរតួចំបងក្នុងការរៀបចំរបៀបរៀបរយសណ្តាប់ធ្នាប់សង្គមនោះ គឺ “នីតិព្រហ្មទណ្ឌ” ។ នីតិព្រហ្មទណ្ឌត្រូវបានចែកចេញជាបីសណ្ឋានគឺ៖  នីតិព្រហ្មទណ្ឌទូទៅ នីតិព្រហ្មទណ្ឌពិសេស និង នីតិវិធីព្រហ្មទណ្ឌ ។

§  នីតិព្រហ្មទណ្ឌទូទៅ៖ ជាកម្រងអត្ថបទច្បាប់ដែលសិក្សាអំពីគោលការណ៍ទូទៅដូចជាការសិក្សាលើបទល្មើសចំណាត់ថ្នាក់នៃបទល្មើសចរិតលក្ខណៈ នៃបទល្មើសដំណាក់កាលនៃការប្រព្រឹត្តបទល្មើស ធាតុផ្សំនៃបទល្មើស និងជាពិសេសសិក្សាលើគោលការណ៍ការអនុវត្តទោស ។ល។

§  នីតិព្រហ្មទណ្ឌពិសេស ៖ ជាកម្រងអត្ថបទច្បាប់ដែលសិក្សាអំពីបទល្មើស ប្រភេទបទល្មើស និងអំពីទោស ប្រភេទនៃទោស  ដូចជាទោសក្នុងបទឧក្រិដ្ឋ  បទមជ្ឈិម និងបទលហុជាដើម ។ អត្ថបទច្បាប់នេះ សិក្សាលើនិយមន័យ អត្ថន័យ និងធាតុផ្សំនៃបទល្មើសនីមួយៗ ។                      

§  នីតិវិធីព្រហ្មទណ្ឌ ៖ ជាកម្រងអត្ថបទច្បាប់ដែលសិក្សាអំពីវិធានទាំងឡាយស្តីពីការរៀបចំការ ប្រព្រឹត្តទៅនៃស្ថាប័នតុលាការព្រហ្មទណ្ឌគ្រប់ជាន់ថ្នាក់​​ និងកំណត់នូវវិធានស្តីពីនីតិវិធីចោទ ប្រកាន់ នីតិវិធីស៊ើបអង្កេត នីតិជំនុំជម្រះ ព្រមទាំងកំណត់អំពីសិទ្ធិអំណាចទាំងឡាយនៃអង្គ ចៅក្រម មេធាវី មន្រ្តីនគរបាលមន្រ្តីយុត្តិធម៌ គូភាគី សាក្សី អ្នកជំនាញ ។ល។

ការបំពានលើសេចក្តីសម្រេចខ្លះៗ របស់តុលាការ គឺជាបទល្មើសមួយក្នុងចំនោមបទល្មើសនានាដែលមានចែងក្នុងក្រមព្រហ្មទណ្ឌឆ្នាំ ២០០៩ ដែលគេសង្កេតឃើញមានការកើតឡើងក្នុងសង្គមជាញឹកញាប់ដែរ ។ តើការបំពានលើសេចក្តីសម្រេចខ្លះៗ របស់តុលាការមានលក្ខណៈយ៉ាងដូចម្តេច ? ដើម្បីងាយស្រួលក្នុងការយល់ឲ្យបានលំអិតកាន់តែច្បាស់គប្បីសិក្សាស្វែងយល់ដូចខាងក្រោម៖

ការបំពានលើសេចក្តីសម្រេចខ្លះៗរបស់តុលាការ

             I.     សញ្ញាណ

§  ជាសញ្ញាណដែលមានចែងក្នុងក្រមព្រហ្មទណ្ឌឆ្នាំ ២០០៩ មាតិកាទី២ អំពី ការប៉ះពាល់ដល់វិស័យយុត្តិធម៌ ជំពូកទី៤  អំពីការបំពានលើសេចក្តីសម្រេចខ្លះៗ របស់តុលាការ

§  ជាអំពើដោយដោយចេតនាដែលបំពានលើសេចក្តីសម្រេចរបស់តុលាការ ហើយគឺជាកាតព្វកិច្ចរបស់ជនគំហាតនោះ

§  អំពើបំពានលើសេចក្តីសម្រេចខ្លះៗ របស់តុលាការ ចែកជា ៩ មាត្រាអំពីបទល្មើស៖

-         បទបំពានលើបម្រាមស្នាក់នៅ

-         បទមិនគោរពតាមវិធានការត្រួតពិនិត្យ

-         បទបំពានលើទោសបិទផ្សាយ

-         បទបំពានលើទោសហាមឃាត់ផ្នែកវិជ្ជាជីវៈ

-         បទបំពានលើទោសដែលកម្រិតសិទ្ធិខ្លះ

-         បទមិនគោរពការរឹបអូស

-         បទបដិសេដប្រគល់លិខិតបើកបរ

-         បទបំពានលើកាតព្វកិច្ចការងារសហគមន៍

-         បទបំពានលើកាតព្វកិច្ចដែលប្រកាសលើនីតិបុគ្គល

§  និយមន័យនៃបទល្មើសនីមួយៗ មានភាពខុសគ្នាទៅតាមអំពើ ធាតុផ្សំនៃបទល្មើស និងអាស្រ័យទៅលើគោលដៅនៃការប្រព្រឹត្តបទល្មើស ។

          II.     ការបំពានលើសេចក្តីសម្រេចខ្លះៗ របស់តុលាការ

ក. ធាតុផ្សំនៃបទល្មើស

          ១. ធាតុនីត្យានុកូល

យោងតាមមាត្រា ៥៧៦_{­​  ​}ក្រមព្រហ្មទណ្ឌឆ្នាំ ២០០៩ បទបំពានលើបម្រាមស្នាក់នៅ ៖ អំពើរបស់ជនដែលត្រូវហាមឃាត់ចំពោះការស្នាក់នៅដែលបញ្ញត្តអាជ្ញាធរតុលាការ ហើយមានមុខនៅទីកន្លែងដែលគេហាមឃាត់ដល់ខ្លួននោះត្រូវផ្តន្ទាទោស ដាក់ពន្ធនាគារពី ១ឆ្នាំ ទៅ ២ឆ្នាំ និងពិនន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៧៧  ក្រមព្រហ្មទណ្ឌឆ្នាំ ២០០៩ បទមិនគោរពតាមវិធានការត្រួតពិនិត្យ ៖ អំពើរបស់ជនដែលត្រូវហាមឃាត់ចំពោះការស្នាក់នៅដែល គេចវេសពីវិធានការនៃការត្រួតពិនិត្យ ដែលបញ្ញត្តអាជ្ញាធរតុលាការ ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៧៨  ក្រមព្រហ្មទណ្ឌឆ្នាំ ២០០៩        បទបំពានលើទោសបិទផ្សាយ ៖ នៅក្នុងករណីដែលទោសបិទផ្សាយសេចក្តីសម្រេចរបស់តុលាការ ត្រូវបានប្រកាសអំពើបំបាត់ចោល លាក់បំបាំង ឬហែកចោលប័ណ្ណប្រកាស ត្រូវផ្តន្ទាទោសដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ពី ១សែនរៀល ទៅ ១លានរៀល ។

យោងតាមមាត្រា ៥៧៩  ក្រមព្រហ្មទណ្ឌឆ្នាំ ២០០៩        បទបំពានលើទោសហាមឃាត់ផ្នែកវិជ្ជាជីវៈ ៖ នៅក្នុងករណីដែលទោសហាមឃាត់ចំពោះការ វិជ្ជាជីវៈត្រូវបានប្រកាសដោយអាជ្ញាធរតុលាការ អំពើបំពានលើការហាមឃាត់នេះ ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨០  ក្រមព្រហ្មទណ្ឌឆ្នាំ ២០០៩         បទបំពានលើទោសដែលកម្រិតសិទ្ធិខ្លះ៖ ការបំពានដោយទណ្ឌិតទៅលើកាតព្វកិច្ច ឬការហាមឃាត់ ដែលជាលទ្ធផលនៃទោសព្យួរលិខិតបើកបរ ទោសហាមឃាត់ចំពោះការកាន់កាប់ ឬការយកតាមខ្លួននូវអាវុធ គ្រឿងផ្ទុះ និងគ្រឿងរំសេវគ្រប់ប្រភេទ ទោសហាមឃាត់ចំពោះការចេញឧបករណ៍អាចជួញដូរបាន ទោសបិទទ្វារគ្រឹះស្ថាន ឬទោសបណ្តេញចេញពីលទ្ធកម្មសាធារណៈ ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨១  ក្រមព្រហ្មទណ្ឌឆ្នាំ ២០០៩         បទមិនគោរពការរឹបអូស ៖ អំពើបំផ្លិចបំផ្លាញ លាក់បាំង ឬគៃបំបាត់វត្ថុរឹបអូស ដាក់ពន្ធនាគារពី ១ខែ ទៅ ៦ខែ និងពិន័យជាប្រាក់ពី ១សែនរៀល ទៅ ១លានរៀល ។

យោងតាមមាត្រា ៥៨២  ក្រមព្រហ្មទណ្ឌឆ្នាំ ២០០៩         បទបដិសេដប្រគល់លិខិតបើកបរ ៖ អំពើមិនព្រមប្រគល់ឲ្យដល់អាជ្ញាធរមានសមត្ថកិច្ច នូវលិខិតបើកបរដែលត្រូវព្យួរ ឬវត្ថុដែលត្រូវរឹបអូសនោះ មិនគោរពតាមសេចក្តីសម្រេចរបស់តុលាការ ដែលមានអនុភាពអនុវត្ត ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨៣  ក្រមព្រហ្មទណ្ឌឆ្នាំ ២០០៩ បទបំពានលើកាតព្វកិច្ចការងារសហគមន៍ ៖ អំពើបំពានដោយទណ្ឌិតលើកាតព្វកិច្ចដែលជាលទ្ធផលនៃទោសការងារសហគមន៍ ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨៤  ក្រមព្រហ្មទណ្ឌឆ្នាំ ២០០៩         បទបំពានលើកាតព្វកិច្ចដែលប្រកាសលើនីតិបុគ្គល៖ កាលបើកាតព្វកិច្ច ឬការហាមឃាត់ត្រូវបានប្រកាសទៅលើនីតិបុគ្គល ការបំពានដោយរូបវ័ន្តបុគ្គល ដែលត្រូវអនុវត្តកាតព្វ ឬការហាមឃាត់នេះត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ២ឆ្នាំ និងពិន័យជាប្រាក់ពី ២លានរៀល ទៅ ៤លានរៀល ។

ទោសបន្ថែមៈ ប្រភេទ និងរយៈពេល

យោងតាមមាត្រា ៥៨៥  ក្រមព្រហ្មទណ្ឌឆ្នាំ ២០០៩ ៖ ទោសបន្ថែមៈ ប្រភេទ និងរយៈពេល ៖ ចំពោះបទមជ្ឈឹមដែលមានចែង ទោសបន្ថែមដូចតទៅនេះ អាចត្រូវបានគេប្រកាស

§  ការដកសិទ្ធិខ្លះជាពលរដ្ឋ ជាស្ថាពរ ឬសម្រាប់រយៈ ប្រាំឆ្នាំយ៉ាងច្រើន ។

§  ការបិទផ្សាយសេចក្តីសម្រេចផ្តន្ទាទោសសម្រាប់រយៈពេល ពីរខែយ៉ាងច្រើន ។

§  ការផ្សាយសេចក្តីសម្រេចផ្តន្តាទោសនៅក្នុងសារពត៌មាន ។

§  ការផ្សាយសេចក្តីសម្រេចផ្តន្តាទោសតាមគ្រប់មធ្យោបាយទូរគមនាគមន៍ សោតទស្សន៍ សម្រាប់រយៈពេល ៨ថ្ងៃយ៉ាងច្រើន ។

២. ធាតុសត្យានុម័ត

ធាតុសត្យានុម័តនៃការបំពានលើសេចក្តីសម្រេចខ្លះៗ របស់តុលាការ ស្តែងឡើងតាម  រយៈអំពើប្រព្រឹត្តិរបស់ជនល្មើសដោយការបំពានលើបម្រាមស្នាក់នៅ  ការបំពានលើទោសបិទផ្សាយ ការបំពានលើទោសដែលកម្រិតសិទ្ធិខ្លះ ការបំពានលើទោសហាមឃាត់ផ្នែកវិជ្ជាជីវៈ  ការបំពានលើកាតព្វកិច្ចដែលប្រកាសលើនីតិបុគ្គល  ដែលប្រកាសដោយតុលាការ  ការមិនគោរពតាមវិធានការត្រួតពិនិត្យ ការមិនគោរពការរឹបអូស ការបដិសេដប្រគល់លិខិតបើកបររបស់អាជ្ញាធរមានសមត្ថកិច្ច ការបំពានលើកាតព្វកិច្ចការងារសហគមន៍ ដែលធ្វើឡើងដោយនីតិបុគ្គល ឬរូបវ័ន្តបុគ្គលដែលតុលាការបានសម្រេចប្រកាស នូវសេចក្តីសម្រេច(សាលក្រម ឬសាលដីការ)របស់ខ្លួនឲ្យជននោះអនុវត្តតាមជាដាច់ខាត​នូវសេចក្តីបង្គាប់នេះ និងការបដិសេធមិនអនុវត្តការបង្គាប់បញ្ជាពីអាជ្ញាធរស្របច្បាប់ ។ ចំពោះបច្ច័យវាមានលក្ខណៈប្រយោលច្រើនដែលជាផលប្រយោល ដែលកើតឡើងដោយសារអំពើប្រព្រឹត្តរបស់ជនល្មើសបណ្តាលឲ្យខូច       សណ្តាប់ធ្នាប់សង្គម បង្កអសន្តិសុខសង្គម បង្កឲ្យមានភាពអន់ខ្យោយអសមត្ថភាពរបស់   អាជ្ញាធររដ្ឋ និងមន្ត្រីតុលាការ ជាដើម ។ និងបច្ច័យផ្ទាល់មួយចំនួនដូចជា៖ អំពើប្រព្រឹត្តរបស់ជនល្មើសចេះតែកើតឡើង ធើ្វប៉ះពាល់ដល់វិស័យយុត្តិធម៌យ៉ាងខ្លាំងជាអាទិ៍ ការបាត់បង់ជំនឿទុកចិត្តពីសំណាក់ប្រជាពលរដ្ឋលើវិយុត្តិធម៌ បាត់បង់អភិបាលកិច្ចល្អ ធ្វើឲ្យមានភាពភ័យខ្លាចពីសំណាក់សាធារណៈជនជាដើម ។

៣. ធាតុអត្តនោម័ត

ជនល្មើសដែលប្រព្រឹត្តអំពើបំពានលើសេចក្តីសម្រេចខ្លះៗ របស់តុលាការ ក្នុងគោលបំណងបង្កើតជាព្យសនកម្មឡើង ដែលជាកំហុសចេតនាក្នុងការប្រព្រឹត្ត និងជាកត្តាផ្លូវចិត្តរបស់ជនល្មើសគឺ៖

·         កំហុសចេតនាដោយចំពោះ ៖ ជនល្មើសបានមើលឃើញជាមុននូវបច្ច័យប៉ះពាល់ចំពោះសង្គមបណ្តាលឲ្យខូចសណ្តាប់ធ្នាប់របៀបរៀបរយសង្គម បង្កអសន្តិសុខសង្គម ជាពិសេសសេចក្តីថ្លៃថ្នូររបស់ប្រទេសជាតិ បង្កខូចខាតប្រយោជន៍សង្គមជាតិដែលនឹងកើតមានឡើង ឬ​ពិតប្រាកដនឹងកើតមានឡើង ប៉ុន្តែដើម្បីចង់បាននូវបច្ច័យនេះ ទើបជនលើ្មសប្រព្រឹត្តនូវអំពើដែលជាបទល្មើសនេះ ។

·         កំហុសចេតនា ឬចេតនាទុច្ចរិតរបស់ជនល្មើសជាអាទិ៍៖

-         ចេតនាទុច្ចរិតទូទៅ ៖ ជនល្មើសមានឆន្ទៈរំលោភបំពានលើបញ្ញត្តិច្បាប់ ហើយរារាំងមិនឲ្យ​សមត្ថកិច្ច បំពេញកាតព្វកិច្ចតាមផ្លូវវច្បាប់។

-         ចេតនាទុច្ចរិតពិសេស ៖ ជាឆន្ទៈរបស់ជនល្មើសដែលចង់សំរេចបាននូវគោលបំណងរបស់ខ្លួន​ក្នុងការបំពាន ឬរារាំងបង្អាក់សមត្ថកិច្ចរបស់អ្នករាជការសាធារណៈ និងតុលាការដែលជាអ្នកមានសមត្ថកិច្ច ឬសេចក្តីសម្រេចរបស់តុលាការ ។

ខ. អំពីទោស

យោងតាមមាត្រា ៥៧៦_{­​  ​}ក្រមព្រហ្មទណ្ឌឆ្នាំ ២០០៩ បទបំពានលើបម្រាមស្នាក់នៅត្រូវផ្តន្ទាទោស ៖

-         ដាក់ពន្ធនាគារពី ១ឆ្នាំ ទៅ ២ឆ្នាំ

-         ពិនន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៧៧  ក្រមព្រហ្មទណ្ឌឆ្នាំ ២០០៩ បទមិនគោរពតាមវិធានការត្រួតពិនិត្យត្រូវផ្តន្ទាទោស៖

-         ដាក់ពន្ធនាគារពី ១ឆ្នាំ ទៅ ២ឆ្នាំ

-         ពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៧៨  ក្រមព្រហ្មទណ្ឌឆ្នាំ ២០០៩        បទបំពានលើទោសបិទផ្សាយត្រូវផ្តន្ទាទោស

-         ដាក់ពន្ធនាគារពី ១ខែ ទៅ ៦ខែ

-         ពិន័យជាប្រាក់ពី ១សែនរៀល ទៅ ១លានរៀល ។

យោងតាមមាត្រា ៥៧៩  ក្រមព្រហ្មទណ្ឌឆ្នាំ ២០០៩        បទបំពានលើទោសហាមឃាត់ផ្នែកវិជ្ជាជីវៈត្រូវផ្តន្ទាទោស

-         ដាក់ពន្ធនាគារពី ១ឆ្នាំ ទៅ ២ឆ្នាំ

-         ពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨០  ក្រមព្រហ្មទណ្ឌឆ្នាំ ២០០៩         បទបំពានលើទោសដែលកម្រិតសិទ្ធិខ្លះត្រូវផ្តន្ទាទោស

-         ដាក់ពន្ធនាគារពី ១ឆ្នាំ ទៅ ២ឆ្នាំ

-         ពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨១  ក្រមព្រហ្មទណ្ឌឆ្នាំ ២០០៩         បទមិនគោរពការរឹបអូសត្រូវផ្តន្ទាទោស

-         ដាក់ពន្ធនាគារពី ១ខែ ទៅ ៦ខែ

-         ពិន័យជាប្រាក់ពី ១សែនរៀល ទៅ ១លានរៀល ។

យោងតាមមាត្រា ៥៨២  ក្រមព្រហ្មទណ្ឌឆ្នាំ ២០០៩         បទបដិសេដប្រគល់លិខិតបើកបរត្រូវផ្តន្ទាទោស

-         ដាក់ពន្ធនាគារពី ១ឆ្នាំ ទៅ ២ឆ្នាំ

-         ពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨៣  ក្រមព្រហ្មទណ្ឌឆ្នាំ ២០០៩ បទបំពានលើកាតព្វកិច្ចការងារសហគមន៍ត្រូវផ្តន្ទាទោស

-         ដាក់ពន្ធនាគារពី ១ឆ្នាំ ទៅ ២ឆ្នាំ

-         ពិន័យជាប្រាក់ពី ២លានរៀល ទៅ ៤លានរៀល ។

យោងតាមមាត្រា ៥៨៤  ក្រមព្រហ្មទណ្ឌឆ្នាំ ២០០៩         បទបំពានលើកាតព្វកិច្ចដែលប្រកាសលើនីតិបុគ្គលត្រូវផ្តន្ទាទោស

-         ដាក់ពន្ធនាគារពី ១ឆ្នាំ ទៅ ២ឆ្នាំ

-         ពិន័យជាប្រាក់ពី ២លានរៀល ទៅ ៤លានរៀល ។

សេចក្តីសន្និដ្ឋាន

         ដូចនេះយើងអាចសន្និដ្ឋានបានថា អំពើបំពានលើសេចក្តីសម្រេចខ្លះៗរបស់តុលាការទាំងឡាយខាងលើ គឺជាបទល្មើសស្ថិតនៅក្នុងថ្នាក់បទមជ្ឈឹម ដែលប្រព្រឹត្តដោយជនគំហាតព្រហ្មទណ្ឌ និងជនផ្សេងទៀតដែលមានចេតនារារាំងក្នុងការអនុវត្តនូវសេចក្តីសម្រេចរបស់តុលាការ ឬបុព្វសិទ្ធិរបស់អាជ្ញាធរធម្មានុរូប ។

ឯកសារយោង

    កម្រងឯកសារនីតិព្រហ្មទណ្ឌពិសេស សាស្រ្តាចារ្យ គង់ ស្រីុម សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច

•   នីតិព្រហ្មទណ្ឌពិសេស សាស្រ្តាចារ្យ សុខ រឿន សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច
•     ក្រមព្រហ្មទណ្ឌឆ្នាំ ២០០៩
•     រដ្ឋធម្មនុញ្ញនៃព្រះរាជាណាចក្រកម្ពុជា ឆ្នាំ ១៩៩៣